Mat 17 | BEF | STEP | To loebe loebe loebe yege bulago minelete Yesu Pita hiti Yemesi hiti to ai gona'a Yoni hiti enele'mo mege'i toloto yatama kosagu enele'moto tilago ana kosalo enali'anisigo mine'ahana yabe.

Matthew 17

Yesuhi gufa'a fato suhi huto i gelehe hu'ehina

Mk 9:2-13; Lk 9:28-36

1 To loebe loebe loebe yege bulago minelete Yesu Pita hiti Yemesi hiti to ai gona'a Yoni hiti enele'mo mege'i toloto yatama kosagu enele'moto tilago ana kosalo enali'anisigo mine'ahana yabe. 2 To Yesuhi gufa'a enali enubulo le'mo fato suhi hu eto'ehina yabe. To okaba'a fi besa loloto yege legi huto huto hu'ehina. To gukete'a koholina huloto gulu gulu luto fi besa lo'ehina. 3 To koyapa bomale'i Moseugo Elaiyaugo Yesutoga nehetilete kaga lite nehago bu ge'ahana. 4 Pitau ya hago bu enogoloto ma luto Yesuhi lu emi'ehina: Sipi Bo, ya'maga nohuta bati huto nohune. Kai bati huto yabe litogomo yege nohi loegi monegi maga gilune. Mone kai'i yagi mone Mosehi yagi to mone Elaiyahi yagi huto gi lepalalube. 5 Ai kaga luto nohigo sopohi mone besa lo'ehinauba enele'mo samapahi bu'ehina. To ana soponuguti nogo mone ma luto huto hu'ehina: Ya'ma ai nibita hina pana'ni nohibe. Nani nipa'ni aitoga emilata nohube. Lenali kaga'a keheli emilo. 6 Ya noligo Yesuhi koko pana'amagi topa hete sipi koli hilete melugu enokabagati lipi gehesa hi'ahana yabe. 7 Ya hago Yesu enalitoga oloto enugufalo meko huloto lu epi'ehina: Lenali koli mehite ho tilo. 8 Ya ligo enali be go saga hilete Yesu ai'asigo nohigo bu ge'ahana yabe. To loemale'i minigi'aha'ina yabe. 9 Enali ana kosa he'milete kapo melete nelimite amuya kaga luto enekesa biloto Yesu ma luto lu epi'ehina: Ya'manana huto higo lenali bu ge'ahana lenali bona'i luga'a meepilo. Lenali komopatinigu melelete nehinogo Kokulumaguti limi'ehina Bouba keli he'miloto ho tilenogo ana kaga lu huto hilo. 10 To Yesuhi koko pana'amagi ma lite loka he'ahana: Keya ka kehelise bomagi hena hibe lite Elaiyau yata'a alibe lilata nehabe? 11 Ya lago Yesu lu epi'ehina: O'yo, ma'naka nelabe. Elaiyau asaga'na oto li loloba hilube'mu yata'a kohe toto o'ehina yabe. 12 Ya hu'ehina nani ma'naka luto lu nolepube. Elaiyau ai ao'ehibe. Ya hu'ehinamo bona'magi Elaiyau nohibe lite menekehelibe. Ya hite enali enemehuba hinanamofihi mege'i melete nehite fato fato suhi hi ete'ahana yabe. Kokulumaguti limi'ehina Bomofihi ana suhi hi etete gabu'i gilinana hi etalana'mu yabe. 13 Yesu ya luto lu epigo enali koko pana'amagi enekesa i hokolo higo Yoniu nagami folo epolose bomo'mu linagi lite keheli bebe se'ahana yabe.

Pana'i mone foipa feleuba le'mo foipa nolana Yesu le'mo bati hu'ehina

Mk 9:14-29; Lk 9:37-43a

14 To enali babu boana'i nupa hite nehanalo nehe netigo bo moneuba Yesutoga oto gigusa'agu lipito minoloto ma lu'ehina: 15 Sipi Bo, kai pana'nimofihi kiginaga fi emibo. Ai negi nagi noto nominago gufa'a nohetibe. To ai babu yupahi afoya tibibi nohuto nagamilugu ho koto kola to logogu ho koto kola nohibe. 16 To nani koko panaka nehanalo le'mo bati hu etalafi luto le'moto onamo enali le'mo bati mehilana'a hi'ahabe. 17 Ya ligo Yesu ka'alo lu'ehina: Akae, lenali yatai kanalo boana'ise, lenali ka keheli ule'ale huse'natini meminabe, to komopatini bebe soto meminolata hibe. Henaki yupahi lenali hiti nani minoto foipanatini kofeli'ali nohube? To ana bomofi kumu ma luto lu emi'ehina: Panaka le'moto maga obo. 18 Yesu ana foipa felemofihi pana'i he'mi etoto bufa hubo ligo ana foipa fele nohigo ana'asilo ana pana'i bati hu'ehina yabe.

19 Yalo Yesuhi koko pana'asigo Yesutoga elete ma lite loka he'ahana: Hena hu'ehigo lali foipa fele ho menolufune? 20 Ya lago Yesu ma luto lu epi'ehina: Hena'mugope lenali nanitoga komopatini nesi'asi mele'ahana'mu yabe. Lenali ma'naka lu lepilunagi kehelilo. Lenali nalepa legeya'a legi huto nanitoga komopatini nimise'natini minalina, ma kosamofihi mula kegi'a bu molobo lilana ai lenabaga liyafa huto bilina'mu yabe. To lili'na yege yege'i lenalitini lilana'mu yabe. 21 Ya hu'ehina ya'manamofihi foipa fele ho lifise kapo'a fato'i mone meni'ibe. To nose'na mo sito nunumu foya liseubago anasi ana foipa fele ho lifilina'mu yabe.

Yesu fililoto aku'i ho tilinamofihi kaga'a lu'ehina

Mk 9:30-32; Lk 9:43b-45

22 Yesuhi koko pana'a Galili hepato aku'i e nupa hilago kaga mone ma luto lu epi'ehina: Kokulumaguti limi'ehina Bomofihi fateha'amagi enayanugu le'mete bite bilana kana'a anasi hupamone nohibe. 23 Ya hinogo enali ho fililabe. To ai melugu limito yege loegi monegi minoto aku'i ho tilina'mu yabe. Ya luto Yesu lu epigo koko pana'amagi enipagu keta hu'ehina yabe.

Sipi mono noto Yesu takisi efahi he'mi'ehina

24 Yesu koko pana'a hiti Kapaneami hepatoga nehetilago sipi mono noto takisi efahi lise bomagi Pitatoga ete ma lite loka he'ahana: Tisatiniuba sipi mono noto takisiba nohe'mina ni'ifihe? 25 Ya ligo Pitau: O'yo, lu'ehina. To Pitau nonuga notigo Yesu aitogati yata'a ma luto loka ho'ehina: Simoni, kai hena hibe luto nokeheline? Ma melugu enikibina bolo kiyi'afu takisi holata nohibe? Mana hepato boana'magifi to bonoho bona'magibe? 26 Pitau lu emi'ehina: Bonoho bona'magi yabe. Ya ligo Yesu lu emi'ehina: Ya hu'ehinagi ya'mana hepato bona'i takisi efahi mehe'milana'a huto ni'ibe. 27 Ya hu'ehina lali enele'mo topa ho lalune. Kai nagami hefuto buloto faya huku molobo. To yata'a lilata faya'i lito baga'a li aka huloto efahi bu galata'mu yabe. Kai ya'mana efahi liloto nani kaika hiti takisi he'mitogo su halibe.